बाल शिवाजी शाळेत विद्यार्थ्यांचे जल्लोषात स्वागत 

जठारपेठ स्थित बाल शिवाजी प्राथमिक शाळेत शाळेच्या पहिल्या दिवशी विद्यार्थ्यांचे जल्लोषात स्वागत करण्यात आले. नवीन शैक्षणिक सत्रानुसार ३० जून शुक्रवार रोजी शाळेच्या पहिल्या दिवशी बालगटाच्या व वर्ग १ली, २ री च्या विद्यार्थ्यांचा प्रवेशोत्सव साजरा करण्यात आला. 

सर्व शिक्षिकांनी हर्षोल्ल्हासात विद्यार्थ्यांचे औक्षण करून,फुले देऊन स्वागत केले. तसेच फुले घेऊन बॅण्डच्या तालावर विद्यार्थ्यांनी जल्लोषात शाळेत प्रवेश केला. विद्यार्थ्यांनी सरस्वती पूजन केले आणि रांगोळीमध्ये ओम गिरवून वर्गात प्रवेश केला.  वर्ग २ री  च्या विद्यार्थ्यांनी फुले देऊन वर्ग १ ली च्या मुलांचे स्वागत केले. याप्रसंगी विद्यार्थ्यांना खाऊ देण्यात आला.  अशाप्रकारे विद्यार्थ्यांनी प्रवेशोत्सवाचा आनंद लुटला. याप्रसंगी बाल शिवाजी प्राथमिक शाळेच्या मुख्याध्यापिका सौ.कीर्ती चोपडे,बाल शिवाजी माध्यमिक शाळेच्या मुख्याध्यापिका सौ. संगीता जळमकर, सर्व शिक्षिका व कर्मचारी वृंद उपस्थित होते.